Vawiin thuvawn
Thuf 19:7 Mi rethei unaute zawng zawng chuan an vai huat thin a, thian maite chu a lakah an va hla lehzual dawn êm! Thuin a um a; nimahsela an kal daih tawh.
Editorial
Tun sawrkarah Saiha Dist a vanduai?
Kan Mizoram sawrkar chak tak, MLA member pawh nghah tak sawrkarah kawng thenkhatah chuan kan thatpui hle niin a lang a, kawng thenkhatah erawh Saiha Dist chu a vanduai nge? ngaihsak a hlawh lo zawk, mipui ten harsatna an tawk nasa mek a ni.
Tarlan thin tawh angin tun kum hnih khat chhung hian Saiha Civil Hospital chu Dist Hospital tiin a hming thlak a ni a, Doctor leh Nurse engemawzat an rawn la nghal a, Tuipang CHC ah Doctor an awm lo va, Chhuarlung CHC ah pawh an awm lo va, mipuite an buai nasa thin a, Saiha ah pawh Doctor leh Nurse tlemte ten chawlh hman hlek lovin an buai nitin zantin a, Office post ruak a tam em em bawk a, Post ruak hna thawk kawptu tan pawh a hahthlak em em bawk a, hetia Officer post ruak a tam avang hian mipuite chuan kawng hrang hrangah harsatna an tawk chho mek bawk a ni.
Heti khawpa kan dinhmun thalo hi kan ram hruaitu a bik takin kan Dist Council-a lama thu kan ram hruaitute hian Mizoram sawrkarah an nawr ve a pawimawh a, NGO te pawhin hma an lak a ngai bawk a, kan Dist Administrator pawhin kan chhiatzia hi Mizoram sawrkarah chipchiar taka ziaka Officer post kim a nih loh pawhin a pawimawh zual tal an rawn dah theihna turin hma a lak ve a ngai a ni.
Tin,kan Cong Party hruaitu chak takte pawh hian Party thanlenna tur lam leh contract therhlo ah ringawt rilru seng lovin kan Dist pum thatna tur atan rilru sengin hma la ve se, rorel lai party hruaitu an nihna angin tan la thei se a lawmawm ngawt ang. Ti, Pu S.Hiato, Cabinet Minister tan pawh mualphona a ni a, chak takin nawr se a lawmawm hle bawk ang.
Ngun taka ngaihtuah chuan tun sawrkarah kan dist hi a vanduai hle niin a lang a, chuvangin ruling lamte hian tan la teh se.
Maraland mipuite kan tanrualna atang chauhin UT kan hmu thei ang -M.Laikaw
Pu M.Laikaw, MDC, President, MDF chuan Mararamin UT a hmuh theihna tur chuan Mararam mipuite kan tanrual a ngai a ni, a ti.
He thu hi nimina MDF Party Office a chhungkaw thum MDF a lawmluhna inkhawm buatsaihah sawiin Pu M.Laikaw chuan, Mararam tana UT dil tura ke pen a nih dawn khan Mararam mipuite ngaihdan lak hmasak a ni a, Mararam mipui 75% in UT dil an duh avangin 1995 January ni 25 khan UT diltu pawl tiin MDF party hi din a ni a ti a.
Mi thenkhatin MDF hian MADC ah a sawrkar khan UT dil turin session ah resolution puluh awm tak a ni tia an sawi chu sawifiahin MDF in MADC a sawrkarna a siam lai khan MDF hlang a ni lo va, party dang (MNF & Cong) nen an sawrkar dun avangin Coliation sawrkarah chuan Party pakhat policy tihhlawhtling turin putluh a rem lo tih a sawi a, MDF hlang a sawrkar veleha a tih hmasak ber tur pakhat a nih thu a sawi a, MLA bial pahnih kan neih hi MDF in a lak vek phei chuan Central sawrkar pawhin a harsat dawn lo tih a sawi bawk.
Tuna MADC a Cong sawrkar chung chang pawh sawiin Pu M.Laikaw chuan, he sawrkar hi Mararam mipui rintlak sawrkar a ni dawn lo tih chu a din dan atang khan a chiang, a ti a. Rinawm lote avanga sawrkar din a ni a, an lakah mipui beisei tur a awm lo tih kan hre lawk a, pawi an khawih tur erawh ven a ngai a ti bawk.
Tunah hian hlawh pek tur pawisa an nei tawh lo va, hetih lai hian sawrkar hna lak erawh a chawlh lo niin a sawi bawk a,kan EM thenkhat te phei chu an nupui, an tu leh fa te nen ni tinin Office ah an inzui thin tih a sawi bawk.
Mi thar chhung kaw 3 a lawmluh te chu Pu N.Beikhai, N.Colony , Pu S.Pawkhei,College veng leh Pu C.Samau, Meisavaih te an ni a, Mararam Politics dinhmun tih booklet pawh mipui chhiar theih turin a tlangzarh nghal a ni.
Harsatna tawk
Tuipang leh a chhehvel mipuite innghahna ber Tuipang CHCah Doctor an awm lohna a rei tawh avangin mipuite an buai hle a, tin, Chhuarlung CHC ah pawh Doctor an awm ngai lo tluk a ni bawk a, Phura a Doctor awmchhun pawh Mizoram sawrkarin a intiam anga a awm leh tak loh avangin ban mai a duh a, an chelh ding hram hram mek.
Tarlan tawh thin angin tun kum hnih khat chhungah hian Saiha Dist mipuite enkawl tur Doctor leh Nurse bakah Officer te chu Mizoram sawrkarin min rawn lak chhuah sak nasa a, an aiawh tur a rawn dah tawh lem loh avangin Officer leh Doctor awm lohna Office leh Damdawiin a awm nual tawh a, DC Office phei chu tunlai tak hian Office pahnih chauhin a vil mek a ni.
Disconnect mek zel
Saiha PHE Division hnuaia tui connection nei bill pe tha lo te chu tunlai hian an disconnet mek zel a. Tuna an disconnect te hi reconnetion an tih loh chuan zawm sak an ni dawn lo va, reconnection ti tur pawhin disconnet runpui an zawh fel phawt loh chuan an ti thei dawn lo bawk.
DC Thang mek
Pu Kunal, DC Saiha chu N.Delhi ah a thang mek a, Aizawl a Meeting leh thil dang pawimawh a tih zawhah Delhi ah a kal thla nghal a, thla tharah a lo haw ang. DC a awm loh chhungin Pu N.Chakhai PD, DRDA in charge a la.
DTO Hovin Meeting
Nimin khan Pu Donny Lalruatsanga DTO Saiha hovin DC’s Conference Room Saiha ah kan hma lawka Fimkhurna Hapta hman dan tur leh Saiha Dist chhungah traffic mivement a lo fel fai zawk theihna tur chungchangte sawiho in lirthei neitu pawl te, MVI leh Traffic police te nen an thukhawm a. Hetah hian Saiha Dist, a bik takin Saiha Town chhunga lithei khalhtute rules an zawm that lehzual theih nana hmalak dan turte an sawiho bawk a ni.
Lecturer Hna zawm
GHSS zirlai ten lecturer an neih loh avanga Mizoram sawrkhar lakah an nawrhna chu a hlawhtling chho mek a. HC. Malsawmathanga leh C.Jonie Zonunpuii te chu Geography ah hna an zawm tawh a, Math ah C.Laitha in a zawm tawh bawk a, Chemistry ah erawh tumah an la zawm lo.
MPF bial siam a ni dawn a, Hruaitu an thlang nghal ang
MPF Saiha chuan veng thenkhatah Bial, MPF Constituent Forum a din dawn a, dt.28.10.2011 hian N.Saiha, College veng, N.Colony, Saiha vengpui, Council veng, Saiha tlangkawn leh Meisavaih ahte a din dawn a, inthlanna pawh an neihpui nghal zel ang.
Socio-Economic and Caste Census-2011 training
Indiaram pum chhiarpui 2011 neih mek zel ah chhungkaw dinhmun zirchianna ( Socio-Economic and Caste Census-2011) leh tu turte chu nimin khan DC’s Conference Hall Saihaah training pek an ni a, he training ni 2 awh tur hi Pu H.Lalhmingthanga, Election Officer, SDO(S) charge la mek chuan a hman pui.Hetah hian Rural area a census nei turte an tel a, vawiinah Urban area a nei turte an training leh ang.
Training hawngtu Pu H.Lalhmingthanga chuan Enumerator te chu dik leh felfai taka an hna thawk turin a fuih a. Saiha Dist chhungkaw tin dinhmun zirchiangtu tur an nih avangin an pawimawh em em dawn a, hei hian India Economic ah te nasa taka thu a neih dawn avangin Saiha Dist hmasawn zelna turah pawimawhna thui tak a nei dawn bawk avangin in tin tlawha chhungkaw tin dinhmun hi felfai taka zirchianga record turin a fuih bawk a ni.
Tunhnai khan population chhiarpui neih niin zawh fel a ni tawh a,tunah hian chhungkaw tin dinhmun, eng hna thawk nge tihte, sum lakluh leh chi leh hnam chungchang te zirchian leh record a ni leh dawn a ni.
He trainingah hian thupui then hran panga te sawi zauna neih a ni a, Pu AZ.Beisia, APO,DRDA bakah Pu K.Zoramhluna leh Master trainer ten training hi an pe a ni.
No comments:
Post a Comment