Dt.20.10.2011 Chhim Aw Daily Newspaper

Dt.20.10.2011 - BRGF sum Mizoram sawrkarin a la kawl
District hnufual zawkte enkawlna tur sum sawrkar laipuiin Saiha Dist tana kum 5 chhunga hman tur BRGF sum min rawn pek chu Central sawrkar chuan Mizoram sawrkar kutah a rawn hlanna a rei tawh a. Mizoram sawrkarin Saiha Dist kutah a rawn release lo avangin tun thlengin Saiha Dist ah hna thawh theih a ni ta lo. He sum hi kum tin cheng nuai 1,000 zel, kum 5 chhung hman tur a ni.


Dt.20.10.2011 - Ni 15 a pelh ta
MJA Dist Hqrs. Saiha in BSNL Signal chhe lutuk chungchanga hma an lakna kal zelah tunhnai khan tun thleng ni 15 hma ngeia rawn siamtha tura huntiam an pe chu a liam tawh a. An rawn siamthat hriat a ni lo va, signal pawh a chhe ngaiin a la chhe reng a, chuvangin MJA Dist Hqrs. Saiha chuan a rang lamin na takin action a la tawh dawn a, hetah hian mipuite tawiawmna a mamawh dawn a, tin, kan vaia that tlanna tur a nih avangin tupawh an hmalakna dal zawnga hmala lo turin a ngen a ni.


Dt.20.10.2011 - MADC hnuaia zirtirtu ten sawrkar hun tiam an siamsak a tawp tep
MADC hnuaia P/S leh M/S ten MADC sawrkar in hlawh a bat sak thla hnih chhungah pe tura an tih chu an la pe thei rih lo va, hun an pek pawh tun thla hi a ral chuan a tawp tawh dawn a, hun tiam chhungah an pe thei lo a nih chuan an kal zel dan tur an ngaihtuah leh dawn a ni.



Dt.20.10.2011 - Nu leh naupngte hriselna awareeness training bul tan a ni.
Saiha Dist-a naupang thi an tam avang a Pu Kunal DC Saiha hmalaknain ECM KNP leh MCHP member 10 te chu Mararam khaw tinah nu leh naupang hriselna chungchang zirtirna pe turin nimin atang khan an tan a. Saiha tlangkawn atangin bul tan niin a hawnna Prog pawh buatsaih a ni a. Heng nu pawl member 10 te hi Saiha Dist Hospitalah nu leh naupang hriselna training an pek dan tur an lo train hmasa tawh a ni.



Dt.20.10.2011 - Hmanraw hman tlak loh an hmang a, Hna a tha thei lo
BRGF hna thawh thenkhatte chu hmanraw hman tlak lohte hmanga thawh a nih avangin a that tur angin a tha thei lo.
Tunhnaia SDDVC in thingtlang lama an zin chhuah tum khan BRGF sum hmanga hna thawhte bakah Saiha Dist hmasawnnan tur atana CSS emaw Mizoram sawrkar kut thlaknate an endik a, khami tum khan VC House te, School building thenkhatte chu an hmanraw hman a that loh avangin hmang lo turin hnathawktute an ngen a, mahse an hmang ta tho a ni.
An balu hman thenkhat chu nul lei, thlai chin nana an hman thin hi a ni a, he balu hi lei chi khat mai a nih avangin SDDVC te chuan hmang lo turin an ti a, mahse BRGF hna enkawl tura an rawih JE ten an phal a ni ang; an hmang leh vek tih thu dawn a ni a, hetianga hna an thawh a an enkawl avang hian Saiha Dist a BRGF hna hi a that tur angin a tha thei tak tak lo va, an thing hman then khat phei chu kum khat pawh a dai lo a, a pawi hle a, zahthlak em em bawk a ni.
Hetia hna a that theih loh avang hian thuneitu te hnenah tha taka thawk turin SDDVC chuan a ngen thin a, that chhoh tura beisei a ni.


Dt.20.10.2011 - Editorial - Dist Council Staff tam lutuk hi
Kan Dist Council hnuaiah hian hnathawktu Staff an tam ta hle a, hnathawktu an tam ngaihtuahin ram tan an hnathawh a chak phah tak tak chuang lo va, lak belh zel a ni bawk a, tunah chuan control sen loh leh hman sen loh hnathawktu an awm ta nia hriat a ni a, heng hnathawktu an lakte thar zel te hi mi rethei zawkte chhawmdawlna tur atana plan sum rawn kal hmangin hlawh an pe a, tunah phei chuan Plan sum a rawn thlen pawhin mipui lamah a thleng tak tak tawh lo va, hlawhah an sem zo deuhthawh ta a nih hi.
Kan Dist Councila thu EM leh CEM te hi mipui duhdan anga rorel tura thlantlin leh Office ah pawh thuttir an ni a, an duh duha sum hmang tur leh hna thawk turin mipuiin an thuttir lo tih hi an hriat a pawimawh a ni. Office an luah tawh chuan mipui duhdan hi engnge tih an ngaihtuah tawh lo niin a lang. Mipuiin an duh thu ram hmasawnna tur atana plan sum rawn kal te, CSS sum rawn kal leh hnathawh tur hrang hrang te hi mipui duhdan angin hman ni se tih hi a ni. Mipui duh dan chu engnge kan tih chuan sum rawn kal te a hlawk thei ang bera hmanga zakzeh lo turte, vote zawn nana hmang lo va, mi rethei zawkah te hman ni se tihte, tin, Staff hi vote zawn nan lak belh tawh loh ni se tihte, hnathawktu tam lutuk leh thutna tur leh dawhkan pawh nei lova attendence register ah sign a hlawh la mai thinte hlawk zawka chhawr ni se tihte hi a ni a, hei lo pawh a tam. Mahse heng mipui duh dan hi tunah hi chuan za a zah a thelh loh pawhin za ah 80 chu a thelh ngei a rinawm a ni.
Chuvangin tuna MADC a sawrkarna kalpui mek te hian a bik takin hnathawktute hi la tawh lo se la, plan sum rawn thleng hi mi rethei, hmeithai te chhawmdawl nan hman tur a awm theih nan tul lutuk lovah hi chuan plan sum hmanna tur hi ngaihtuah tawh lo se a tha khawp ang.