Vawiin Thuvawn
Ephesi 6:1-4. Naupangte u, Lalpaah chuan in nu leh in pate thu zawm rawh u; chu chu thil dik a ni si a."I nu leh i pa chawimawi rawh," (chu chu thupek tiam nei hmasa ber a ni.) "Chutichuan, i tan a tha ang a, leiah hian i dam rei bawk ang." Tin, nangni pate u, in fate tithinur suh ula, Lalpa thununnah leh zilhnaah chuan enkawl zawk rawh u.
MADC Court Building hawn a ni
MADC Court Building cheng nuai 40 senga sak chu nimin chawhma dar 11:00 AM khan Pu S.Khipo, CEM. MADC chuan a hawng a, Dist Council a din tirh atanga Court Building tha nei lova kum 39 a lo kal tawh hnuaia Pathian leh Mizoram sawrkar vanga building tha tak hmang thei tura hawn a ni ta chu lawmawm a ti. He Building hawnna Prog, MADC Court Building Complex a neih hi Pu TA.Chhohu, Executive Secretary, MADC chuan a kaihruai a, Rev. Thylua Hlychho, Executive Secretary, ECM Hqrs. chuan hunserh hmangin Building leh a chhunga thawk te Pathian hnenah a hlan a.
He Building hawngtu Pu S.Khipo, CEM chuan thu sawiin Court Building hi dik taka rorelna, pawn lam atanga engemaw avanga inrawlh theih lohna hmun leh dan hmanga dikna tanchhana rorelna hmun tur a nih angin thawktute leh mipuite pawh a zahawmna kan humhim a pawimawh dawn a ni, a ti a.Heta tel MADC Officer leh Staff te hnenah fuihna thuchah sawiin a hun taka Office kal leh ban a pawimawh thu te, mipuite rawngbawltu an nihna hre renga an thei ang tawka an harsatna chingfeltu tur an nihna te hre thar tura a chah bakah thahnem ngai taka thawk turin a fuih bawk a ni.
Pu H.Sahlo, EM, Judicial, Pu V.Vanhupa, EM, PWD leh Pu LC.Hlychho, MDC te pawhin thu an sawi bawk a,Pu P.Tluasa, EE. PWD in a sak dan report a pe a, Dr.J.Pathy, Court President in lawmthu sawiin Prog hi tihtawp a ni a, Prog zawhah thingpui tuihnai tak inho nghal a ni.
He Court Building hi a hnuai ber chhiar telin chhawng thuma sak a ni a, 37x47 feet a lian a ni a, kum khat chhung sak niin Pu P.Tluasa EE PWD in a enkawl a ni.
MNF Kum 50 tlin lawmna
Naktuk hi MNF Party dincham vawi 50 na ( Golden Jubilee) a ni. Mizoram pumah ropui taka hman a ni dawn a, Saihaah chuan zanin tlai dar 6:00 PM ah M.Saiha DZ.Tlang, Helipad ah Meidet Prog buatsaih a ni dawn a ni. He Prog hi Mizoram pumah inang veka tih tur a ni.
Awareness Training
Nimin khan DC’s Conference Hall Saihaah Dr.Gordon Zohmingthanga, Mission Director, NRHM leh Dr. R.Lalthanga, State Prog Officer (ECH) te chuan Saiha Dist chhunga naupang thihna rate Dist dang te aia a san bik avangin naupang ten an lo hrisel zawk theih nan VCP leh Secretary te kokhawmin awareness training an neihpui.
Saiha Dist ah kumin 2nd quarter ah khan naupang kum 5 hnuai lam 29 an thi a, Dist dangte aia naupang thihna a tam avangin Mizoram sawrkar, Hrealth Deptt chuan a bik taka hmalak tul nia hriaiin awareness Campaign leh training te an rawn neihpui mek a ni.
Mock Drill nei
Nimin khan GHSS Saiha ah chhiatrup na a thlen thulha chet lak dan tur practicala entirna ( Mock Drill) Disaster Management Deptt Saiha te buatsaihin neih a ni.
Result a chhuak har
MADC hnuaia Primary zirtirtu post 30 lakna tur written test leh personal interview pawh neih zawh tawh chu tun thlengin result a chhuak thei lo va, engtikah nge a chhuah dawn pawh hriat a la ni lo. Heta exam te a chhuah hun tur an nghal hlelin a inup rei ta hle tih kan palai an hrilh.
NLUP sum 1st instalment sem
Nimin khan Industry Deptt hnuaia NLUP dawngtu mi 18 hnenah 1st Instalment an sem chhunzawm.
Saiha Dist a NLUP dawngtu a bik takin thingtlang lam thenkhat chu an hlawhchhampui nghal nia thu dawn a ni a, a then phei chu hlawhtlinpui tum lem lo, 1st instalment bak beisei lote an ni. Hei hi NLUP dawngtu tur thlan dan a fuh loh vang leh Cong party in Village Level NLUP Board thuneihna chhuhsaka an party Office dawhkan atanga an duhsak zawng an thlan mai vang nia hriat a ni bawk.NLUP hi a hlawhtlin theihna turin Guideline fel tak siam a ni a, mahse a siamtuten an bawhchhe leh si a, hemi avang hian tum dan angin a hlawhtling thei dawn lo a ni. Mahse thil reng reng hi za a tihhlawhtlin hi a har a,NLUP pawh za a za hlawhtling tur chuan beisei lo ila, a tam zawkin an hlawhtlinpui chuan thil ropui tak anga ngaih tur a ni.
JNV ah Class VI tan admission lak theih
JNV School Sihtlangpuiah nakum 2012-2013 session a class VI zir duh tan admission form lakchhuah theih a ni.Lawngtlai leh Saiha Dist a kumin 2011-2012 session a class V zirlai,JNV school a kal duh, ni 1.5.1999-30.4.2003 inkara piang an ni tur a ni a, rualban lote pawh a luh theih ang. Kum thar April ni 14 ah GHSS, Lawngtlai ah selection test nei tur a ni. Hre chiang duh chuan DEO Saiha ah leh I&PRO Office Saihaah ate zawh fiah theih a ni. Seat 80 chauh a awm.
Editorial
Kan Fai chhunzawm reng tur kan ni
Faina Hapta kan hmang zo chiah tihin he hapta laia hmun fai tha tak takah te bawhhlawh hmun tur a awm tan leh mek a. Faina Hapta lai chauh fai tur kan ni lo a, englai pawha fai tur kan ni tih kan rilru ah kan theihnghilh loh a tha hle mai. Faina hapta kha fai chhunzawm reng tura kan inzirtirnaah ngai ila, nghet takin pawm bawk ila a tha ang.
Faina Hapta laia fai tha hle si a, a tawp veleha tawp lehnghal mai te hi thil zahthlak tak pakhat a tling a. Faina ngai pawimawh lo kan nihna pawh a lang a, faina leh thianghlimna hlutzia hriat lohna a ang hle bawk a, a bik takin office te phei chu mipui tlawh ber leh chen tamna ber a nih avangin a lang hma bik em em a, tin, Officer te mizia lanna pawimawh tak pakhat a nih tel bawk avangin faina hapta lo lai pawha fai reng nihte hi a hlu-in officer ( Head of Office) tan pawh a hlimawm bik em em a ni.
Zirna in pawh fai thei hle tura ngaih a ni. Zirlai naupangte hi lehkha zirtir chauh hi an dawng tur a ni lo va, thuawihna te, nundan pawi leh Pathian tih chunga nitina an nun fimkhur turte, faina leh thianghlimna ngai pawimawh turte leh a dang dangte dawng tura ngaih an ni a. Naupangte chu an naupan lai atanga faina leh thianghlimna an ngaih pawimawh theihna tura zirtirtu ten an zirtir hneh chuan in chhungkhurah te leh khawi-ah pawh tawp leh bal te, bawhhlawh reng reng hi an ngai thei dawn lo a ni. Chu chu chhungkua in a hlawkpui dawn a, khawtlang pawhin a hlawkpui dawn a ni.
Chuvangin faina leh thianghlimna hi kan awmna hmun apiangah kan ngai pawimawh tur a ni a, Faina Hapta lai chauha fai leh thianghlim ni lovin englai pawha fai ber leh thianghlim ber ni turin tan i la chhunzawm zel ang u.
No comments:
Post a Comment