Vawiin atangin school hawn a ni dawn
Thla hnih chhungah an demand tihlawhtling turin MADC an phut
MADC leh Mizorawm sawrkar in MADC hnuaia Primary leh Middle School zirtirtute hlawh (Arrea) an pek that loh avanga zirtirtu ten lungawi lohna an lantir chu ECM Kohhran Hqrs, Mararama VC hruaitute, MSO Gqrs. leh Pu K.Hrahmo, EM Edn. te ngenna avangin an nawrhna an titawp a, vawiin atang hian school hawn tan ni se an ti a, an demand erawh MADC Executive hian thla 2 chhungah tihlawhtling se an ti.
He thu hi tun Inrin ni kha Saiha Press Club ah thuthar lakhawmtute kawmin an puang a.Hetah hian Pu RC.Chinzah, Chairman, PTA & MSTA Jt.Meeting chuan Press Meet an neih hmaa N.Col.P/S a Saiha Town chhunga zirtirtute bakah thingtlang atanga lo kal mi 272 te thukhawm hman hmawhin resolution a pass chu puangin, Pay Arrear chungchanga lungawi lohna kan lantir avanga zirtirtu tu pawhin harsatna an tawh chuan PTA& MSTA Jt. Committee in hma a la zel ang, MADC 2nd instalment sum Rs. 611 lakhs Mizoram sawrkarin a cut hi pawi kan ti a, tun hnuah chuan cut tawh lo se, PTA&MSTA Jt. Action committee hi nghet takin a ding zel dawn a, thehdarh a ni ngai lo vang tih leh zirtirtu dikna leh zahawmna rapbet zawnga tawngkam leh thil tih dang awm tawh suh se tite resolution an pass a ni. Tin, thla 2 chhunga tihlawhtling tura an phut hi an demand zawng zawng cheng nuai 1042.15 ah Rs. 137.20 a ni.
Zirtirtu pawl hruaitute chuan an chanvo dik tak an chan theihna tura an hmalaknaah PTA leh MSTA inkarah inlungrual lohna a awm theihna tura hmalatu an awm chu an rilru puitlin tawk loh vang nia an hriat thu an sawi a, tin, an demand thenkhat chu tun MADC a sawrkar hian an sawrkar lai mi a ni lo tia an sawi avangin pawi an tih thu an sawi bawk a, hei tak hi an thil hlauh ber pakhat a nih thute leh hetiang rilru an neih avanga a bo thei mai ang tih an hlauh thute pawh an sawi tel nghal a ni.
Zirtirtu pawl hruai tute chuan MADC sawrkar hmasa Pu M.Laikaw kaihhruai sawrkar khan an hlawh (Arrear) thenkhat chu pe turin a tifel vek tawh a, mahse Mizoramah sawrkarna a inthlak khan Cong in sawrkarna a kalpui a, Pu Lal Than hawla CM chuan Pu M.Laikaw khatih laia CEM chu hna thawk thei lo turin order a rawn chhuah khum a, hun reiloteah MADC ah Cong sawrkar thar a piang nghal bawk a,sawrkar thara heiseina thar kan nei a, mahse min pe ta lo va, a zuzi a, tun dinhmun hi kan thleng ta a ni, an ti.
MADC in kum 2010-2011 atana budget house an pass chu Rs.5078 lakhs a ni a, Mizoram atanga MADC in sum a dawn chu nuai 6172 a ni a, 2010-11 ah hian budget pass aiin nuai 1094 in a tam a, hetah hian kan DA Arrear te pawh a tel ka ring tih sawiin mahse beisei dan ang a nih loh thu an sawi bawk.
Tin, Pu RC. Chinzah chuan MADC a Zirtirtute DA Arrear kan hmuh theihna tura Mizoram sawrkarah nawr tura tir anga an sawi leh, TA/DA pawh pek a ni tia an sawi te, ani pawhin a nawr hlawhtling thei lo tia MADC executive lamin an sawi chu dawt a ni tiin an hre sual palh a ni, a ti a, Education Deptt in Office a an chhawr lai khan Aizawlah pawh tir a ni a, mahse DA Arrear buaipui tur erawh vawi khat pawh tir a nih loh thu a sawi bawk a ni.
PTA & MSTA hruaitute chuan an thil phut a hlawhtlin theihna tura hma an laknaa mipui thlawpna an dawng chu lawmawm an tih thu an sawi a, chutih rual chuan zirlai te zirna dawng lova an awm kha pawi an tiin zirlai nu leh pate chungah hriatthiamna an ngen nghal bawk a ni.
PWD hna thawk tha lo
Mizoram sawrkar PWD Deptt in a enkawl kawngpui samfai hna chu tunlai hian thawh tan mek a ni a. Hmun thenkhata an sam fai chu sam fai a ang hle a ni.He kawngpui BRTF kuta a awm lai kha chuan a ziaawm hle a, Mizoram sawrkarin a enkawl atangin kawngpui pawh a ang tawh lo va, a chhiat siamthatna kawngah an chau hle a, a hnim sam fai pawh an ti mai mai tawh bawk a, hmin sam fai hi nikumah pawh khan chhe deuhin an lo thawk tawh a, Er. N.Chhylai, EE, PWD, Saiha hnenah report a ni a, thawk tha deuh tawh turah mipui ten kan ngai a, mahse chhe tak leh ti mai mai niawm takin an thawk leh mek a a ni.
BRTF atanga kawngpui enkawl hna lachhuaka Mizoram PWD kutah dah tum a nih lai khan Zoram mipuite chuan a enkawl hneh lo vang tih an hlau-in an sawisel nasa kha a ni a, an hlauh ang ngeiin Zoram pumah kawngpui enkawl na lamah harsatna an tawk nasa a, kawngpui tha kan neih loh phah a, Saiha Dist ah pawh mipui hlau ang ngeiin harsatna an tawk mek a n.
Za-ah za
Mizoram Oepn Boxing Championship Mamit a khelh zawh takah chuan Saiha Dist Boxer 6 in an khel a, an 6 in medal an dawng vek. An medal dawn te hi Gold -3, Silver 2 leh Bronze 1 niin vawiinah Saiha an lo lut dawn a ni.
Chhawng 6 na
Evan SR. Lalsanglura, Synod Evangelistic Team Speaker hmanga LIKBK N.Saiha in Salvation Camping a buatsaih a chhawng nga na chu tun Inrin ni khan zawh fel a ni a, vawiin atangin a chhawng rukna an tan leh ang.A duh apiang luh theih a ni e.
Saiha Dist a Officer post ruahna te
1. Addl. DC
2. SDO(S)
3. BDO
4. DRO
5. Manager Industry
6. Doctor 3,Tuipang ah 1
7. Manager. Stationary
8. ICDO Tuipang
Heng Officer indaih lo thenkhat hi Officer dang ten an kawp a, Officer pakhat in Post 3 lai a kawpna a awm a, kawp lova hna thawh lohna hmun pawh a awm bawk a ni. Tin, a then hi a la ruak chiah lo va, hun reiloteah ruak turte a ni bawk.
1st ah pass
Pu Derick Salai Solo chu tunhnai lawk khan LL.M 1st ah tha takin a pass a,a pumpuiah 7 na a ni.Tunah hian Pu C.Siatha leh MJS personal interview hma chhawn turin an inpuah chah leh mek.
No comments:
Post a Comment